Tradishon oral i idioma komo vehíkulo pa traspaso di Herensia Kultural Intangibel

Bou di tradishon oral ta kai un variedat amplio di formanan ekspresivo mediante idioma, ku ta inkluí entre otro proverbio, dicho, kuenta, rima, leyenda, mito, kantika, poema, orashon, formanan di venerashon verbal, aktonan teatral i hopi mas.
Tradishon i ekspreshon oral ta yuda transmití, konservá i traspasá konosementu, balornan kultural i sosial, e memoria kolektivo di un komunidat. Aportando asina pa mantené e kultura bibu.
Tradishon i ekspreshon oral ta keda traspasá partikularmente di boka pa boka. Pa e motibu akí un tradishon por tin diferente forma, interpretashon i splikashon. Netamente esaki ta hasi tradishon i ekspreshonnan oral asina riku.