Arte tradishonal ta para pa tur ekspreshon kultural ku ta reflehá e kreatividat humano di un komunidat, ku a pasa di generashon pa generashon i ku te na sierto altura, por mira bèk den e diferente áreanan di Herensia Kultural Intangibel.

Kualkier forma di arte tradishonal ta muchu mas ku solamente un forma di entretenimentu. E por hasi un rekuento di historia di un komunidat, e por aklamá i/òf honra un personahe heroiko di un komunidat i e por duna un refleho sosial di un komunidat (tantu e logronan komo e luchanan di un komunidat).

Arte tradishonal aparte di p.e. ekspreshon teatral i musikal por ta tambe trahamentu di busto, obra di skreinwèrker, trahamentu di pòpchi tradishonal di bòter ku paña i diferente otro fishi tradishonal ku awendia práktikamente no tei mas (blekero, platé, sneiru).

Trahamentu di instrumentonan musikal segun método tradishonal tambe ta parti di arte ekspresivo di un komunidat.