Herensia Kultural Tangibel Monumento

Un monumento ta algu ku ta enserá un memoria ku ta mará na un personahe òf un suseso importante i notabel di un grupo òf un komunidat. E por ta un estatua, un edifisio, un konstrukshon trahá ku e intenshon pa rekòrdá/ konmemorá.
E monumento por tin un balor importante pa e pais kaminda e ta ubiká. E por tin un balor importante tambe riba nivel internashonal (komunidatnan rònt mundu).
Un monumento ta tambe un edifisio di 50 aña òf mas, ku tin un importansia históriko pa un pais i komo tal ta keda protehá pa lei lokal. Si e edifisio tin un balor importante pa e sosiedat internashonal esaki lo keda protehá mediante e tratado internashonal di herensia mundial pa UNESCO.
Un monumento por keda konsiderá importante pa motibu di su bunitesa, balor artístiko, arkeológiko, históriko, su balor agregá pa siensia, historia nashonal, internashonal i su balor tradishonal.
Kòrsou tin aktualmente 870 monumento nashonal ku ta rekonosé i protehá, di kua 800 ta den sentro di siudat. Un kantidat di 60 ta lanthùis i misa. (www.monumentenfonds.org)
For di desèmber 1997 Kòrsou su sentro di siudat (Punda i Otrobanda) ta riba e Lista di Herensia Mundial di UNESCO [UNESCO World Heritage List].