Artesania Tradishonal
Artesania Tradishonal
Artesania tradishonal den e kombenio 2003 di Herensia Kultural Intangibel di UNESCO ta enfoká partikularmente riba e téknika i konosementu enbolbí pa krea artesania tradishonal.
Artesania tradishonal di Kòrsou ta konsistí di diferente tipo di material manera entre otro paña, klei, kabuya, kueru, palu, kabana, papel, kalbas, kaska di palu, kokolishi, èts.
E produkto por ta un prenda, instrumentonan musikal, artefaktonan ku uso den bida diario, arte dekorativo, vehíkulo di transportashon [kitoki, dori, garoshi], kos di hunga pa mucha, trahe, sambarku i hopi mas.
Konkretamente esaki ke men ku ta hopi importante pa tin e konosementu di por ehèmpel kua mata ta palu di lele, na ki momento por kòrta e palu sak’é for di naturalesa i kon ta trat’é [téknika] pa yega na e produkto final ku ta e lele. Pues e sabiduria i téknika pa produsí e lele ta importante.
-
Menshoná algun produkto di artesania tradishonal i splika kua konosementu i téknika mester pa yega na e produkto.
Kontesta
- Pal’i lele (mester sa ta kua palu e ta, ki ora por kue, kon tin ku trat’é, èts.)
- Pal’i Funchi (mester sa ta di kua palu e ta, ki ora por kue e palu, kon tin ku trat’é, èts.)
- Barí/ tambú (mester sa ta kueru di kua bestia ta usa, kon ta trata e kueru, kon ta rèk e, di kua palu ta traha e barí, èts.)
- Gobi (mester sa kua midí di kalbas ta apropiá, kua kalbas ta bon sea seku òf bèrdè, kon ta trata e kalbas pa e no kibra/daña, èts.)
- Chikoti (mester sa kua palu ta adekuá, e largura eksakto, ki ora ta adekuá pa kòrté èts.)
- Tròm di kalbas (mester sa kua tipo di kalbas i kon traha ku e kalbas pa e produkto logra)
- Ta konsiderá artesania tradishonal na un momentu den tempu komo relikia i ta keda traspasá komo tal di generashon pa generashon.
- E abilidatnan pa krea artesania tradishonal ta enrikesé ekspreshon kultural di un komunidat.
- E generashon modèrno ta siña hopi for di e konosementu vasto akí.
- E konosementunan akí ta yuda aportá tambe na un desaroyo produktivo di e komunidat su industria kultural.