Herensia Kultural Kòrsou

Un pueblo ku konosé su kultura i sa di apresiá esaki semper lo mustra rèspèt pa su patrimonio kultural. Den nos afan pa forma i konsientisá pueblo di Kòrsou, spesialmente mucha i hóben nos ta ofresé e material akí.

E material akí ta optenibel den forma di un pòwerpòint i un manual i tambe di e forma digital akí.

E propósito di e pòwerpòint i e manual ta pa forma entrenadó ku ta traspasá informashon i konosementu di e kontenido manera entre otro maestronan, lidernan di aktividat despues di skol i lidernan di trabou sosial kultural den bario, ku ta haña primeramente informashon relevante pa nan formashon propio. E informashon ku nan atkerí lo kontribuí na formashon i konsientisashon di e mucha, e hóben i tur otro persona ku ta interesá. E informashon presentá lo sirbi pa rekonosé, kuida i salbaguardiá patrimonionan kultural di Kòrsou. Di e manera akí herensia kultural den nos komunidat ta haña e lugá ku e meresé.
E informashon den e forma digital akí ta kompañá pa diferente aktividat ku tantu e entrenador i e kursista [mucha , hóben i adulto] por usa pa praktiká i tèst su konosementu.

Den seis tomo ta duna informashon amplio riba e diferente tópikonan relashoná ku Herensia Kultural i alabes ta traha tareanan. Kada tomo ta trata un di e siguiente tópikonan:

• Herensia Kultural
• Herensia Kultural Tangibel (material)
• Herensia Kultural Intangibel (inmaterial)
• Herensia Natural
• Industria Kultural
• Kargadó di kultura

Kon ta usa e material?

Na man robes por mira e kontenido di e material.
Na momento ku klek riba un di e tomonan, e ta mustra tur e tópikonan konserní.
E tópikonan ta duna informashon sea den forma di un teksto i/òf un tarea.
Tin tarea ku ta duna posibilidat pa traha na un manera aktivo, esta digital.
Den e kaso akí, e usuario/kursista mes por kontrolá/chèk si su kontesta ta korekto. Den kaso ku e kontesta ta korekto, e material ta indiká esei.
Na momento ku e kontesta no ta korekto, e material ta indiká esaki i ta duna e kontesta korekto. Pues e kursista ta siña mesora.
Den e balki abou por skohe pa bai e siguiente lès òf e lès anterior.
E material ta simpel i agradabel pa usa.
Kuminsá semper na Tomo 1. E ta fundeshi di e kontenido.
Kada tomo ta kaba ku un sírkulo di Herensia. E intenshon ta pa después di kada tomo e kursista hasi un evaluashon personal. E kursista tin ku wak su mes desaroyo. E tin ku wak unda e mes ta den e sírkulo ei.